राशनकार्ड नवीनीकरण के बुता जब से चलत हे तब से राशनकार्ड म नाव जोड़े-हटाये के काम कछुवा के चाल म चलत हे- 

बिलासपुर। अनिल कुमार पाली/ राशनकार्ड नवीनीकरण  के नाव म शासन ह फ़ोटो बदले के बुता ल तो कर दिस फेर नवीनीकरण के आड़ म खाद्य विभाग अउ नगर निगम ह राशनकार्ड म नाव जोड़े के अउ हटाये के काम ल कछुआ के चाल म ले आइस, नगर निगम म बइठे अधिकारी मन से पूछे म नवीनीकरण के गोठ ल करथे फेर नवीनीकरण के आदेश म कहूँ नवा मनखे के नाव जोड़े ल बंद करे या जुन्ना मनखे के नाव ल हटाये के कोई निर्देश नइ दिए गे हे ऐखर बाद भी कर्मचारी मन अपन मनमर्जी ले नाव जोड़े अउ हटाये के बुता ल बंद कर दिस जबकि एप्स के माध्यम ले या राशन दुकान के माध्यम ले कहूँ भी नाव जोड़े के बुता नवीनीकरण म नइ करे जात हे।

खाद्य विभाग अउ निगम के जिम्मेदार रहिस हे कि नवीनीकरण के संगे-संग राशनकार्ड म नाव जोड़े के बुता भी चलत रहना रहिस हे, फेर मनखे मन ल परेसान करे नइ आदत अधिकारी कर्मचारी के रहिथे जेखर कारण कोनो भी बहाना बना के गरीब मनखे मन ल योजना ले दुरिहा रख के बुता ले बचे के बुता कर्मचारी मन करथे। 

आज बिलासपुर खाद विभाग म राशनकार्ड म नाव जोड़े के जानकारी ले बर गे से पता चलिस के नाव जोड़े के काम अभी बंद हे, दु दिन बाद से चालू हो सकथे अउ नाव जोड़े के बुता नगर निगम जोन क्रमांक के माध्यम से करे जाही, निगम के अंदर संचालित जोन ल दु दिन के बाद लॉगिन आईडी दे दिए जाही अइसे बिलासपुर खाद्य विभाग म बइठे कर्मचारी के को कोती ले बताए गिस हे।