भाजपा सरकार के फोटो राशनकार्ड म लगाए बर करे जात हे नवीनीकरण-

बिलासपुर । अनिल कुमार पाली // प्रदेश म सार्वजनिक वितरण प्रणाली के 77 लाख राशनकार्ड नवीनीकरण होना हे जेमा ले 14 लाख राशनकार्ड धारी मन आवेदन प्रस्तुत कर डारे हे, फेर ऐखर ले जनता के परेशानी अउ बढ़ गिस हे, नवीनीकरण के बुता सुरु होये के पहली राशनकार्ड म पारिवारिक सदस्य के नाव जोड़े अउ नाव हटाया के बुता चलत रहिस हे, फेर जबले नवीनीकरण के बुता सुरु होये हे तब ले राशनकार्ड म नाव जोड़े-हटाये के काम ल बंद कर दिए हे जेखर से अब परिवार के सदस्य के नाव ल जोड़े बर या हटाये बर नवीनीकरण के बुता पूरा होये के इन्तेजार करे ल लगही।

मोबाइल ले खाद विभागक एप म होवत हे, ऑनलाइन नवीनीकरण जेमा सिर्फ  पंजीयन नंबर डाले ले एक प्रक्रिया म नवीनीकरण हो जावत हे, जेकर ले समझ आथे की कार्ड म सिर्फ नवीनीकरण नाव म ऊपर कवर बदलही अउ कोनो नवा लाभ जनता ल नइ मिले, कुछ मन के कहना हवय के राशनकार्ड म पूर्व मुख्यमंत्री भपेश बघेल के अउ पूर्व खाद्य मंत्री के फोटो लगे हे जेल बदल के नवा मुख्यमंत्री अउ नवा खाद्य मंत्री के फोटो लग जही जेखर बर लाखों रूपिया खर्च कर के जनता ल परेसान करे जात हे।

अभी वर्तमान म राशनकार्ड नवीनीकरण के बुता 15 फरवरी तक चलही जब त राशनकार्ड म नाव जोड़े-हटाये के बुता ह बंद रही।