छत्तीसगढ़िया क्रान्ति सेना के छत्तीसगढियावादी विचारधारा से जुड़े अउ जोहार छत्तीसगढ़ पार्टी समर्थित पंच, सरपंच, उपसरपंच, जनपद मनला सम्मान करें बर रैली-

कोरबा:- दिनाँक 29/03/2025 दिन शुक्रवार के जोहार छत्तीसगढ़ पार्टी के जिला अउ खंड के जम्मो पदाधिकारी अउ सेनानी मन त्री स्तरीय पंचायती चुनाव म विजयी होये हमर छत्तीसगढ़िया क्रान्ति सेना के छत्तीसगढियावादी विचारधारा से जुड़े अउ जोहार छत्तीसगढ़ पार्टी समर्थित पंच, सरपंच, उपसरपंच, जनपद मनला सम्मान करें बर रैली के माध्यम से उंखर पंचायत म जाके उनला छत्तीसगढ़िया गमछा, नरियर, पुष्म आदि के माध्यम से सम्मानित कर सबो ल अपन-अपन पंचायत के विकाश बर बेहतर कार्य करे के निवेदन करत सबो जन प्रतिनिधि ल बधाई देहेन अउ संगे संग पंचायत स्तर म हमर छत्तीसगढ़िया संस्क्रिति ल बढ़ावा देहे के सबो एक संघरा किरिया घलौ खाइन इही बीच ग्राम पंचायत चाकाबूडा के सेनानी मन के कहना रहिस की आज के दिन एक विशेष अउ ऐतिहासिक घड़ी रहिस, जिहां छत्तीसगढ़िया क्रान्ति सेना अउ जोहार छत्तीसगढ़ पार्टी के जिला पदाधिकारी मन नव निर्वाचित सरपंच, उपसरपंच अउ पंच मनला बधाई देवत गांव के विकास, छत्तीसगढ़ियावाद अउ हमर सांस्कृतिक पहिचान ऊपर विशेष चर्चा करे गीस। समान रैली के कार्यक्रम म सबसे पहली ग्राम पंचायत सिरकी, चाकाबुडा, देवरी, जवाली, बोइदा, नोनबिर्रा, पुटा, अउ उड़ता पंचायत म जाके सम्मान समारोह के बाद कार्यक्रम समाप्त होइस ग्राम पंचायत उड़ता म संगठन के शक्रिय सदस्य मेलाराम जी सरपंच बर निर्वाचित होये हे ।

आज के सम्मान समारोह के आयोजन म छत्तीसगढ़िया क्रान्ति सेना के जिला अध्यक्ष सुरजीत सोनी, जोहार छत्तीसगढ़ पार्टी के जिला अध्यक्ष जैनेन्द्र कुर्रे, जिला संगठन मंत्री सुरेश पटेल, जिला उपाध्यक्ष रविंद्र जगत, ओम केवट, बसंत चंद्राकर, प्रहलाद जयसवाल संग जिला के सैकड़ो जोहार छत्तीसगढ़ पार्टी अउ छत्तीसगढ़िया क्रान्ति सेना के सेनानी अउ पदाधिकारी मन अपन गरिमामय उपस्थिति दिन ।

कार्यक्रम म चर्चा के दौरान गांव ल विकास के दिशा म आगे बढ़ाए बर, छत्तीसगढ़ के तीज-तिहार, रिती-रिवाज, भाषा अउ संस्कृति ला सहेजे अउ मजबूत करे के बात होईस। हमर छत्तीसगढ़ के असली पहिचान तभे बनही जब हमर गांव-गांव म विकास के गंगा बही अउ हमर माटी के बेटा-बेटी मन अपन संस्कार ला नई भुलाहीं।

ग्रामवासी मन के जोश अउ उत्साह देखके ये कार्यक्रम अउ घलो खास बन गे। एमा नवा पीढ़ी मन ला अपन संस्कार संग जोड़े के बात घलो जोर-सोर ले उठिस। विकास सिरिफ सड़क अउ बिल्डिंग ले नई होवय, विकास तब होही जब हमर छत्तीसगढ़ के आत्मा जिंदा रही — हमर तीज-तिहार, हमर बोली -भाखा, संस्कृति अउ हमर भाईचारा ।

हमर_गांव_हमर_अभिमान, हमर_संस्कृति_हमर_पहिचान, हमर_विकास_हमर_सपना जइसने भावना संग जम्मो गांव म नवा सोच के बीज बोये गिस ।